Vi sbagliate ! A statina hè tempu di guerra per i prefetti di Corsica

Forse chì a statina hè tempu di riposu, di vacanze, è dunque pocu è micca rimusciu ambientale… Vi sbagliate ! A statina hè tempu di guerra per i prefetti di Corsica, si dicenu : si vis pacem para ombrellum (chì vole dì : si tu veux la paix prépare ton parapluie). Ci vole à traduce a voce prefetturale : attenti à u vaghjme cù sti rompistacchi di l’associ !
Sapite perchè ? Hè colpa di u veranu scorsu :
li so cascate addossu una mansa di ghjudicamenti d’annulazione di i PLU.
I prefetti sò stati obligati à spiegà à u tribunale è à tutti cum’elli travaglianu i so servizi per fà rispettà a legge  ! O tamante risate per noi, eccu un picculu riassuntu : « Mes services font parfaitement leur travail, j’assume totalement, tout se fait dans la transparence totale, en parfaite concertation, etc. » Pare vera !
Noi vi cridimu ô sgiò prefettu, ma ghjè a ghjustizia chèi dubiteghja è chi per una volta ùn sceglie micca a legge di u più forte ma sceglie a legge per tutti. O chì piacè d’ùn stridà più indè un desertu, è di pensà chì i ghjudici ùn so più sordi, cionchi è muti.
E linguacce dicenu subitu : era ora ! Hè vera chì, frà tempu, i danni sò cresciuti, ma forse chì st’ultimi ghjudicamenti feranu riflette à qualch’uni ch’eranu sicuri di francà si la sempre… Ci permetterebbi qualchì speranza d’avè menu da scumbatte di fronte à tutti i prughjetti sterminendu a natura da la marina à la muntagna.
A lascite ci u nostru sognu : rispettata a legge, salvatu l’ambiente… Forse un sognu d’istatina, chì hà da smarisce quandu vene a nebbia di u vaghjime. Ma, à noi ci hà da permette di ripiglià fiatu. Chì bisognu c’hè quandu certi vi precanu a malamorte, culpevuli chè no simu di difende sempre a nostra terra ? Ma, sèi tù voli a pace, à la natura fà li una bella lascita…